HH4 GAU BELTZA

 Kaixo blog zaleok!

Urria bukaeran gau beltzerako gure gela apaintzeko kalabazak hustutzen ibili ginen. Lan galanta izan zen hiru kalaba handi haiei kandelak sartzeko moduko zuloa egitea, baina gogotsu aritu ginen eta denon artean lortu genuen. Dotoreak gelditu zitzaizkigun kalabazak!

Eta behin gela girotuta, argiak itzali, kandelak piztu eta ohitura zaharrei jarraituz maindire eta alkondara zaharrak jantzita ospatu genuen gau beltza.

Denok elkarrekin gozatu genuen gelan sortutako giroaz eta abestuz goiz ederra pasatu genuen.

Prestaketa lanak eta egun bera nola joan ziren gogoratzeko bi bideotxo prestatu ditugu oraingoan. Zuen gustukoak izatea espero dugu.

Laster arte!

HH4 BARATZA BERTIKALA

 Kaixo blog zaleok!

Oraingo honetan azaroan Zientziako baratza bertikalean erein genueneko argazki sorta aurkezten dizuegu.

Hazi desberdin mordoa izan genituen esku artean: dilistak, artoa, kalabaza, rabanitoak… Mimo handiz erein eta ureztatu genituen eta egunez egun zaintzen ditugu. Prozesu osoa gertutik bizitzen ari gara oraindik ere eta laster gure fruituak erakusteko moduan izatea espero dugu.

Ordura arte, ondo izan!

HH4 PENDULOA

 Kaixo blog zaleok!

Gaurkoan beste esperimentu batekin gatoz: penduloa.

Bideo labur batean bildu ditugu argazki guztiak, gauza desberdinekin nola esperimentatu genuen ikus dezazuen. 

Gauza interesgarri mordoa ikasten ar igara eta gainera ederki pasatu genuen!

Aio!

YAYOI KUSAME

 

Goxatu ederra hartu dugu gure inguruko borobilak esploratuz eta YAYOI KUSAMA ezagutuz

HH4 FAMILIAK ESKOLAN

 Kaixo blog zaleok!

Familiei gurera etorri eta beraien ezagutza zein trebetasunak partekatzeko eskatu genien, eta gaurkoan orain arte izandako hiru bisitak aurkeztu nahi dizkizuegu.

Lehena Koldo izan zen, porruak aldatzen irakatsi zigun aitona. Primeran pasa genuen eta laguntza ezin hobea izan zen gure baratzerako.

Gero Ane ama etorri zen. Intsektuei buruzko datu interesgarri mordoa ekarri zizkigun, eta bereziki inurriei buruz jardun genuen. Adi-adi entzun genuen kontatu zigun guztia eta orain Zientzian berak utzitako inurritegia dugu egunez egun ikasten jarraitzeko.

Azkenik, Asier aita etorri zen gurera. Gau Beltzerako gure gelak apaintzeko hustu genituen kalabazak aprobetxatuz bizkotxo goxoa egiten irakatsi zigun. Osagai desberdinak neurtuz eta nahastuz masa aparta lortu genuen denon artean eta zuzenean labera sartu genuen. Luze xamarra egin zitzaigun itxaron beharreko denbora, baina azkenean dastatzeko aukera ere izan genuen. A ze bizkotxo goxoa!

Izugarri aberasten gaitu familien presentziak eskolan eta hemendik eskerrik beroenak eman nahi dizkiegu gurekin pasatako denboragatik.

 

HH4 1.HIRUHILEKOA

 Kaixo blog zaleok!

Gaurkoan flotazioaren inguruko esperimentua egin genueneko argazki sorta dakarkizuegu.

Objektu desberdinak uretara botatzean zer gertatuko zen esperimentatzen ibili ginen. Hondoratu egingo da? Flotatu egingo du? Edo erdian geldituko da? Hipotesi mordoa egin genituen eta gure artean iritzi ezberdinak bazeuden ere gure begiz ikusi ahal izan genuen zer gertatzen zen benetan. Emaitzak orri batean ondo gorde genituen behar dugun aldiro bertara jo ahal izateko.

Zalantzarik gabe esperimentatzen jarraituko dugu zientziak guretzat gordeak dituen sekretu guztiak ikertzeko.

 

Agur, hurrengo arte!

UDAZKENEKO INSTALAZIOA. HH2

 

Kanpo espazioa proposamen desberdinekin  jantzi dugu, haurrei jolaserako aukerak zabaltzeko asmoz. Proposamenek, materiala sentitu, behatu eta hauekin aritzeko aukera emango digute.Jolasak ingurura zabaltzeko bidea eskainiko digu.